近日在網上很多人批評特首的宣傳口好「我會做好呢份工」。

大部份意見都離不開兩點：

1. 特首暗示佢上面有老闆，佢只係打工仔，唔好難為佢。
2. 特首表示佢做特首「只係打份工」，唔好要求咁多。

第一點：特首的老闆是誰？

大部份網上輿論都係話「北京」，我覺得好奇怪。因為居然網上咁多人都唔知道，特首的老闆，就是時代雜誌本年度風雲人物 - YOU、「你」。
特首並非高高在上，而是務實地為市民服務，會對市民作承擔做交待，相信係特首想俾市民的訊息。

但可惜大部份市民都沒有「我是特首老闆」的意識，大家只希望有一個無需向北京交待的強勢領導人帶領香港 - 特首只需要平日高高在上，偶然親民一下令市民受寵若驚 - 尤如肥彭之流 - 市民便會心滿意足。曾Sir的親民政策，刁鑽地對市民暗示「特首為*你*服務」，可謂對牛彈琴。

第二點：「打工」=「求其」？

原來在香港的慣常語法中，「打工」、「做工」、「打份工」、「做好份工」= 「求其」。

「我都係打份工者！」居然可以作為「求求其其」的藉口。

為何港人對自己的「份工」冇要求？還是大家學校老師教（或者保險經紀/傳銷員）「唔好當係打工，要當係自己事業」？打工同事業的分別，就是「打工」=「求其」？「事業」=「認真」？根本係扭曲「打工」這個詞的用法，而用一個較fancy較吹水的「事業」去替代「打工」一詞。以「事業」去替代「打工」一詞，亦同時扭曲了「事業」的用法。 Job和Career兩個字的關係，就有點似Tatics和Strategy的關係，不可以話「策略」就是「認真」，而「戰略」就是「求其」- 為何香港人覺得打工「應該係」求求其其？我百思不得其解。

以下係對趣兒的回應：

我近來見到好多類似意見，但係我有疑問：點解「打工」=「求其」？「打工」唔係應該好努力地為理想奮鬥的嗎？「打工」唔係應該對自己同公司有承擔的嗎？點解香港人個個覺得「打工」=「卸膊」=「我都係打份工咋，唔好賴我」？

敬業樂業，自細老師就會教，但係香港人普遍都做唔到。

看日劇，就算一個講煮麵師傅都可以拍成套劇出黎睇佢點樣永不放棄，睇佢點樣專業地煮麵，睇佢點樣以煮出最好既麵為傲…

而香港人 - 我覺得會係咁：「喂我煮麵打份工者，煮得唔好咪煮得唔好囉，我之前做保險架嘛」、「我打份工者，煮完麵就放工關人啦，唔通係廚房研究食譜呀？」、「我打份煮麵師傅工你估我想呀？我不知幾想去炒股炒樓發達呀！」、「我做煮麵仔，我自己都睇唔起自己啦，打份工搵兩餐，係煮成咁架喇，咩呀？唔滿意呀？」….

原文 — 趣兒 — 2007-02-03 07:06:06




聽到曾特首竟然話會「做好呢份工」,感覺很負面呢!

當一個人把事業只當作一份工去看待,間接告訴人他對這份工沒有Heart,從沒有打算超越自己,為目前狀況深思如何可以改善,只想做好本份,但求無過,有著穩穩陣陣個個月有糧出就算的心態。原來我們的特首是抱著這樣的心態「打工」!

很幸運趣兒沒有這種心態,但肯定公司內有很多同事是抱著曾特首的心態工作,把事業視在一份工。趣兒的工作,沒有什麼大權,可幸的是仍有一顆心去為公司服務(注意是公司,不是上司),希望看到公司日漸改善,包括流程、制度、政策等,但那是超出我個人工作的範圍呢!我大可把那些所謂問題視若無睹,反正幾十年來都是這樣呢! 不提出改變,各位同事都舒舒服服地活在過往的搖藍中,多幸福喔! 他們都像是在鍋裏的青蛙…

趣兒在這間公司工作了差不多一年,很期望可以因為我的上司比較開明,可以漸漸作出改變。趣兒跟自己說,如果自己發覺有天我的態度開始被這班人同化,便是趣兒離開這份工作的時候了! 因趣兒不能容忍這種像打政府工的工作態度:「少做少錯,唔做唔錯,有鑊就卸」。

也許看倌會有疑問:那為何你不努力向上爬?有朝擁有權力,自能運用自己的權力加上管理技巧去為公司作出改善啦! 很矛盾,趣兒又偏偏愛做乞兒懶做官,權力會令人改變,加上千斤的壓力會霸佔趣兒的所有時間,趣兒認為人生除了工作外,應該還有很多很多,而這也是趣兒之所以仍然能夠保留那份「真」的原因之一。